BIOINFORMATICS

ظهر في السنين الأخيرة حاجة اسمها Bioinformatics أيوة القسم والعلم الغريب اللي محدش فاهمه ده، ولا حتى اللي في القسم نفسهم 

فـ تعالوا مع بعض نحاول نفهم، إيه العلاقة ما بين الـ Bio والـ برمجة.. ونشوف يعني ايه Bioinformatics ..

الأول هندخل جوّه جسم الإنسان تحديدًا في الخلية اللي عاملة بالظبط زي الكمبيوتر ..

كمبيوتر!

آه.. لأن فيها حمض نووي DNA, RNA عاملين زي البرنامج بالظبط، بيكتبوا أكواد ويترجموا وينقلوا Data ويدوا أوامر للخلية تقوم بوظائفها وإزاي تتصرف..

طب إزاي؟! 

الـ حمض النووي ده بيتكون من شفرة بنستخدم فيها ٤ حروف A-T-C-G لو DNA ...و A-U-C-G لو هي RNA ..

وكل ٣ حروف جمب بعض بيعبّر عن (كودون).. آه زي الكود .

يعنى مثلاً دى أمثلة لكودونات مختلفة: ATC - TGA GGA - AAT - GAC - CAG، كل كودون بيعبر عن جين معين و كل جين بيقول للخلية ازاى تصنع بروتين معين

والخلية بعد ما تصنع البروتين بتستخدمه فى أداء وظائف معينة فى النمو و البقاء على قيد الحياة على حسب نوع كل بروتين بقه 

يعني فهمنا من كده أنه في Data عندي بأنواع البروتينات، والـ Sequence بتاع الحروف اللي بتكوّنها، وأنه في خطوات بتتم عشان نوصل للبروتين واحتمال يحصل خلل في النص عادي والبروتين يبوظ أو يتكون بروتين تاني!

فـ جينا بقه دمجنا بين الـ Bio اللي بيطلع Data عبارة عن حروف بتعبر عن الـ DNA/ RNA/ Protein ..

وبين البرمجة بتاعنا في الكلية مع شوية رياضيات و Algorithms .. هيطلع لنا Bioinformatics

طيب وبعدين؟

هناخد احنا المعلومات الوراثية الخاصة بالكائن الحي (اللي هي الحروف) ونخزنها في سجلات صحية إلكترونية،

ونبدأ نشتغل عليها بقه بطرق علمية نحلل بيها البيانات دي سواء بـ Algorithms مخترعينها، أو حاجات جاهزة..

لحد ما نوصل اننا نكون عارفين أن الـ Sequence ده بتاع الكائن كذا، والـ Sequence ده بتاع ڤيروس كذا..

يعني تحليل الـ PCR بنعرف منه في Covid-19 ولا لا عن طريق أنهم عرفوا الـ Sequence بتاعه وبتاع الإنسان فلو لاحظنا وجوده أو لاحظنا خلل في DNA بتاع الإنسان يبقى فيه مشكلة 

في مرحلة تانية بقه وهي أننا بنشتغل احنا ونلعب في الـ DNA ده في المعامل .. نجرب ندمج أي حاجة أو نحذف .. الخ من الجينات ونشوف التأثير والنتيجة.

في برامج كتير موجودة للكلام ده وبيئات عمل مختلفة عملها علماء في المجال ده منها NET BioInformatics. ودي حلوة جدا.. وطبعا كل ده بيخدم المجال الطبي 

وبكده لما حد يسألك يعني ايه Bioinformatics تقدر تجاوب عليه بكل سهولة وثقة